Il plan d'instrucziun dal modul orientaziun professiunala è dividì en champs da cumpetenza. Qua sutvart èn descrits ils cuntegns da l'instrucziun en orientaziun professiunala. Els èn structurads tenor ils champs da cumpetenza dal plan d'instrucziun dal modul.
L'instrucziun sa basa sin las cumpetenzas persunalas (cognitivas ed affectivas) sco era socialas ch'ils giuvenils han acquistà fin ussa. Ella sustegna l'ulteriur svilup da l'identitad e la furmaziun da la persunalitad. Ella porscha occasiuns da giuditgar a moda critica sasez ed auters e promova la prontezza da s'occupar cun la concepziun persunala (professiunala) dal futur.
L'instrucziun intermediescha savida d'orientaziun davart il mund da furmaziun, da professiun e da lavur. Ils giuvenils vegnan rinforzads uschia, ch'els san ir enturn a moda segira cun las differentas aspectativas che lur ambient ha envers la tscherna da furmaziun resp. da professiun. Els s'occupan cun las atgnas caracteristicas biograficas, en spezial areguard las normas specificas per las schlattainas ed areguard las normas socialas e culturalas.
L'instrucziun sa basa sin las resursas persunalas dals giuvenils, rinforza ils giuvenils, sch'i resultan frustraziuns, e sustegna lur abilitad da decider.
L'instrucziun activescha l'occupaziun dals giuvenils cun sasezs e cun las purschidas dal mund da furmaziun, da professiun e da lavur e pussibilitescha experientschas en quests reguards. En l'instrucziun en orientaziun professiunala documenteschan ils giuvenils a moda suandabla il process da tscherna da professiun e redigian documents d'annunzia.
Las cumpetenzas menziunadas en la tabella appartegnan a l'orientaziun professiunala. Ellas vegnan sviluppadas e cuntanschidas en ils champs economia, lavur e tegnairchasa resp. tudestg. Las cumpetenzas da l'orientaziun professiunala ch'èn integradas en ils plans d'instrucziun dals roms, èn marcadas cun renviaments. En la versiun electronica mainan ils renviaments dal chapitel introductiv al plan d'instrucziun dal rom ed enavos.
|
Cumpetenza |
Lieu da l'integraziun |
|
Las scolaras ed ils scolars san sviluppar ina chapientscha per l'impurtanza sociala da la lavur e per las differentas furmas da lavur sco era chapir caracteristicas specificas per las schlattainas e caracteristicas socialas e culturalas tar la tscherna da furmaziun e da professiun. |
